У Рыся

Размешчана аграсядзіба ў вёсцы Карэвічы Свіслацкага р-на Гродзенскай вобласці, у 10 км ад г. Ваўкавыска. Тут, удалечыні ад гарадскога пылу і забруджанага паветра, на прасторных землях Свіслачыны, побач з маляўнічай рачулкай, якая запоўненая заўсёды халоднай і чыстай вадой, і багатым на ягады і грыбы лесам, у асяроддзі невялікай вёсачкі, вы можаце па-сапраўднаму атрымаць асалоду ад вясковага жыцця, сумешчанага з сучаснымі камфортнымі ўмовамі.

У гаспадарскім доме знаходзіцца прасторная камінная зала, дзе так утульна і цёпла можна правесці час з блізкімі людзьмі і адзначыць радасныя падзеі. Сядзіба можа размясціць 30 чалавек на начлег з усімі выгодамі, у задэкарыраваных пад даўніну пакоях з пячным абаграваннем, на казачных, наразных ложках. На тэрыторыі таксама знаходзіцца кухня-хатка і сталовая. Да галоўнай сядзібы прымыкае вялікая крытая тэраса, прызначаная для арганізацыі масавых імпрэз (вяселляў, юбілеяў, карпаратываў) да 130 чалавек.

Побач з гаспадарскім домам узведзены своеасаблівы «дом адпачынку», у якім ёсць і лазня з апарняй ды душам Шарко, і більярдная зала з шыкоўным камінам ды барнай стойкай, і пакой адпачынку з наборамі для фітагарбаты; санвузел; тэраса. Вам прапануюць розныя віды спецыяльна нарыхтаваных венікаў на любы густ: бярозавых, дубовых, рабінавых, з ядлоўцам. Побач з лазняй размешчана вялікая кадка-купель (Фурако) з барнай стойкай, дзе нават у моцны мароз кацёл награвае дзве тоны вады за некалькі гадзін.

З нядаўняга часу ў аграсядзібе з'явіліся заморскія прыгажуні - пародзістыя кабылкі, на якіх вам будзе прапанавана пакатацца па прасторным уладанням. У прыручэнні кабылак дапаможа чароўны інструктар.