Цудоўны, вясёлы і смачны майстар-клас па выпечцы бездражджавога хлеба прайшоў у Ваўкавысскім раёне Гродзенскай вобласці, у аграсядзібе "Альхова". Правядзенне такога мерапрыемства стала магчымым дзякуючы праекту FpB-1616 “Стварэнне Гродзенскай рэгіянальнай партнёрскай сеткі ўстойлівага развіцця «За росквіт Прынёманскага краю»; гэты праект ажыццяўляецца пры садзейнічанні Праграмы падтрымкі Беларусі Федэральнага ўрада Германіі (ППБ).

У межах рэалізацыі праекта быў праведзены конкурс пілотных бізнес-ініцыятыў у сферы ўстойлівага развіцця. У выніку конкурса была падтрымана і ініцыятыва аграсядзібы "Альхова".

 

Падчас майстар-класа госці ўбачылі і самі паспрабавалі замешваць аснову для хлеба на заквасцы, эксперэментаваць з начыннем і аздабленнем хлеба. Навучыліся выпякаць пшанічны і жытні хлеб. Асаблівы сакральны рытуал быў выкананы з дапамогай малітваў і святой вады. Трэба адзначыць, што хлеб выпякаўся ў сапраўднай вясковай печы. Мерапрыемства было дапоўнена выкананнем народных песень ўдзельнікамі раённых клубных устаноў "Рэплеўскі ДК" і "Дулеўскі сельскі клуб".

У новым турыстычным сязоне ў рамках маштабнай праграмы прасоўвання рэгіёнаў-удзельнікаў праекта Растурызму «Гастранамічная карта Расіі» прайшоў «Тыдзень рэгіянальнай кухні ў Маскве». 


На працягу «Тыдня» ў лепшым рэстаране Масквы «Ruski» госці  пазнаёміліся з адмысловым меню рэгіянальных страў, прыгатаваных на базе такіх прадуктаў як аляніна, морапрадукты і рыба Баранцавая мора, дзікія ягады, тайговыя травы, а таксама хіт першага арктычнага мабільнага фестывалю рэгіянальнай кухні «Густ Арктыкі» - салёная трэска «Паўночнае ззянне». На 2019 г. запланавана серыя прэзентацый больш за 10 рэгіёнаў-удзельнікаў федэральнага праекта «Гастранамічная карта Расіі»

З 25 лютага па 3 сакавіка ў Мінску пройдзе традыцыйны XIX Тыдзень беларускай кухні. У мерапрыемствы прымуць удзел прымуць 60 рэстаранаў і кафэ сталіцы.

Тыдзень беларускай кухні праводзяць прыкладна раз ў квартал. Падобныя акцыі спрыяюць развіццю культуры харчавання, а таксама папулярызацыі нацыянальнай кухні сярод жыхароў сталіцы і турыстаў.

У рамках правядзення чарговага Тыдня гасцям будуць прапанаваныя 5 страваў нацыянальнай кухні, у распрацоўцы якіх прымаў удзел шэф-повар рэстарана "Сядзіба" Андрэй Ізмайлавіч. Як звычайна, стравы ва ўсіх установах будуць рыхтавацца па адзіных рэцэптурах і рэалізоўвацца па адзіных цэнах.

Да трэцяга сакавіка можна будзе паспрабаваць:

  •  жур з мясам 250/30/1 – 3 руб. 50 кап.;
  • салат «Журавiны» 190/15/5 – 6 руб. 50 кап.;
  • свініна фаршыраваная па-беларуску з бульбянымі дзелькамі 150/150/30/14 – 10 руб. 50 кап.;
  • грэчанікі з грыбамi 250/30/15/15 – 8 руб. 50 кап.;
  • дзьмухаўцы з мядова-журавінавай паліўкай 150/30/4 – 4 руб. 50 кап.

Крыніца www.tvr.by

Падчас масленічнага тыдня людзі пякуць блінцы, ладзяць гулянні, сустракаюцца з роднымі.

Масленіца – славянскае свята провадаў зімы і сустрэчы вясны. Нават пасля прыняцця хрысціянства ў абрадах святкавання Масленіцы захаваліся адгалоскі паганскага мінулага.

Масленічны тыдзень падзяляецца на два перыяды – вузкі і шырокі. У вузкую Масленіцу (першыя два дні) можна займацца гаспадарчымі працамі. У шырокую (з чацвярга па нядзелю) Масленіцу на змену працы прыходзяць адпачынак, весялосць і стасункі са сваякамі. На вузкую Масленіцу гаспадыня пякла бліны аржаныя, аўсяныя ці ячныя, на шырокую – бліны з грэцкай мукі. Гаспадар разразаў стос бліноў на чатыры часткі крыж накрыж. Кожны з сямейнікаў браў кавалак бліна і еў яго з творагам, залітым растопленым маслам.

У кожны дзень Масленіцы існуюць свае традыцыі і абрады.

ПАНЯДЗЕЛАК – СУСТРЭЧА МАСЛЕНІЦЫ

Да гэтага дня з саломы і старога адзення рабілі пудзіла Масленіцы, якое потым ладзілі на шост і з песнямі вадзілі па вёсцы.

Свёкар са свякрухай адпраўлялі нявестку да яе бацькоў, а ў вечары самі прыходзілі да сватоў у госці.

АЎТОРАК – ЗАЙГРЫШЫ

Моладзь з раніцы ладзіла катанні з гор, усе весяліліся, частаваліся блінамі. Таксама праходзілі агледзіны нявест, каб на чырвоную горку (першая нядзеля пасля Вялікадня) згуляць вяселле.

СЕРАДА – ЛАКАМКА

Працягваліся сямейныя застоллі. У гэты дзень прынята было есці столькі, сколькі зможаш. Цёшчы запрашалі зяцёў на бліны, маладыя прыяжджалі да бацькоў нявесты.

ЧАЦВЕР – РАЗГУЛ

У чацвер праца спынялася, і пачыналася Шырокая Масленіца. Моладзь каталася на конях, сані і конскую вупраж упрыгожвалі рознакаляровымі стужкамі і званочкамі. Гушкаліся на арэлях, ладзілі кулачныя баі, штурмавалі снежныя крэпасці. Усе абавязкова з’язджалі са снежных гор, пелі масленічныя песні. Блінамі частавалі ўсіх суседзяў, мінакоў, жабракоў і старых. Таксама адведвалі бабку-павітуху, частавалі яе, каталі па вёсцы, запрагаліся ў сані замест коней.

ПЯТНІЦА- ЦЁШЧЫНЫ ВЯЧОРКІ

Зяць клікаў цёшчу на пачастунках, зараз бліны ў хаце мужа павінна была пекчы яе дачка. Цёшча магла прыйсці ў госці да зяця са сваімі сяброўкамі і сваякамі.

СУБОТА – ЗАЛОЎКІНЫ ВЯЧОРКІ

Маладая нявестка запрашала залоўку ў госці і абавязкова дарыла ёй падарунак.

НЯДЗЕЛЯ – ПРАВОДЗІНЫ МАСЛЕНІЦЫ, ПРАШЧОНЫ ДЗЕНЬ

На вогнішчы спальвалі пудзіла Масленіцы, вогнішча абавязкова разводзілі на горцы, попел раскідвалі па палях. Спальванне пудзіла Масленіцы адзначала адыход ці смерць зімы. Людзі заклікалі Вясну і лаялі Масленіцу (сімвал зімы), клікалі яе падманшчыцай, аб’ядалай, блінаеднай і іншымі крыўднымі мянушкамі.

Масленічны тыдзень – апошні перад Вялікім постам, які будзе доўжыцца 40 дзён. Скончыцца гэты тыдзень Даравальнай нядзеляй, калі вернікі просяць адзін у аднаго прабачэння.

Заснавала на матэрыялах sputnik.by.

Першы ў 2019 годзе Гастрафэст традыцыйна распачынаецца з кававай тэматыкі. З 15 лютага да 4 сакавіка ў Мінску праходзіць ГАСТРАФЭСТ.КАВА.

20 кавярняў-удзельніц падрыхтавалі свае дэгустацыйныя "візітныя карткі" па адзінай фіксаванай цане - 6,5 рублёў. Сэт складаецца з кавы і дэсерта. Усе кавярні ўдзельнічаюць у народным галасаванні на сайце gastrofest.by і аднайменным канале Telegram. Наведвальнікі фестывалю абяруць “лепшыя” на іх думку сэты. А выбраць будзе цяжка! Прапановы вельмі цікавыя – ёсць і сырны капучына, і zero латэ, і кава са смакам лаванды, слівы, печыва і нават чабора. А яшчэ можна паспрабаваць чырвоную каву!

Генеральны партнёр ўсёй серыі фэстаў - Альфа-Банк. У кожнай кавярні вы зможаце атрымаць карысныя фінансавыя парады. Такім чынам, на фестывалі можна будзе не толькі смачна паесці, але і памножыць свае фінансавыя веды.

Крыніца: afisha.tut.by.